വിജയ് സേതുപതിയും മഞ്ജു വാര്യരും ഒന്നിക്കുന്നു.തിരക്കഥാകൃത്തായ ആര്‍.ജെ. ഷാന്‍ സംവിധായകന്റെ മേലങ്കിയണിയുന്ന ചിത്രത്തിലാണിത്.ബിജു മേനോനും ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്. ഏപ്രിലില്‍ ചിത്രീകരണം ആരംഭിക്കും.മറ്റു താരങ്ങളെ തീരുമാനിച്ചിട്ടില്ല.ചിത്രത്തിന്റെ നിര്‍മ്മാണത്തില്‍ മഞ്ജു വാര്യര്‍ പങ്കാളിയാകുമെന്നാണ് സൂചന. തമിഴിലും ഡബ് ചെയ്യുന്നുണ്ട്.
മഞ്ജു വാര്യരും അമല അക്കേനിയും ഷെയ് ന്‍നിഗവും പ്രധാന വേഷത്തില്‍ എത്തിയ കെയര്‍ ഒഫ് സൈറബാനു എന്ന ചിത്രത്തിന്റെ തിരക്കഥാകൃത്തുക്കളില്‍ ഒരാളാണ് ഷാന്‍. ജയറാം നായകനായ മാര്‍ക്കോണി മത്തായില്‍ വിജയ് സേതുപതി അതിഥി താരമായി എത്തിയിരുന്നു. എന്നാല്‍ വിജയ് സേതുപതിയും മഞ്ജു വാര്യരും ഒന്നിച്ച്‌ അഭിനയിക്കുന്നത് ആദ്യമാണ്.
വിജയ് സേതുപതിയുടെ സൂപ്പര്‍ ഹിറ്റ് ചിത്രമായ 96ല്‍ മഞ്ജുവാര്യരെ നായികയായി നിശ്ചയിച്ചിരുന്നതായി നേരത്തേ വാര്‍ത്ത ഉണ്ടായിരുന്നു. എന്നാല്‍ ഡേറ്റ് ക്ളാഷ് മൂലം ഇരുവര്‍ക്കും ഒന്നിക്കാന്‍ കഴിഞ്ഞില്ല.ധനുഷിന്റെ നായികയായി എത്തിയ അസുരനാണ് തമിഴകത്ത് മഞ്ജു വാര്യരുടെ ആദ്യ ചിത്രം. ഈ വര്‍ഷമാണ് ചിത്രം തിയേറ്ററില്‍ എത്തിയത്. മധു വാര്യര്‍ സംവിധാനം ചെയ്യുന്ന ലളിതം സുന്ദരം എന്ന ചിത്രത്തിലാണ് പുതുവര്‍ഷത്തില്‍ മഞ്ജു വാര്യര്‍ ആദ്യം അഭിനയിക്കുക.ബിജു മേനോനാണ് നായകന്‍.
